ಜಗತ್ತಿನಾದ್ಯಂತ ಸಾಕಷ್ಟು ಆತಂಕಕ್ಕೆ ಎಡೆಮಾಡಿಕೊಟ್ಟಿದ್ದ ಎಚ್1ಎನ್1 ಇದೀಗ ಮತ್ತೆ ಸುದ್ದಿ ಮಾಡಿದೆ. ಕಾಂಬೋಡಿಯಾದ ಪ್ರಧಾನಿ ಹುನ್ ಸೆನ್ ಮತ್ತು ಮೂರು ಮಂದಿ ಸಚಿವರಲ್ಲಿ ಎಚ್1ಎನ್1 ಸೋಂಕು ಪತ್ತೆಯಾಗಿರುವುದಾಗಿ ಕಾಂಬೋಡಿಯಾದ ಆರೋಗ್ಯ ಸಚಿವರು ತಿಳಿಸಿದ್ದಾರೆ.
ಮಾಮ್ ಬುನ್ಹೆಂಗ್ ಅವರು ಪ್ರಕಟಣೆಯಲ್ಲಿ ಈ ವಿಷಯ ಸ್ಪಷ್ಟಪಡಿಸಿದ್ದು, ದೇಶದ ಪ್ರಧಾನಿ ಸೆನ್ ಅವರು ಎಚ್1ಎನ್1 ಸೋಂಕಿನಿಂದ ಬಳಲುತ್ತಿದ್ದು, ಕಳೆದ ಶುಕ್ರವಾರ ಎಚ್1ಎನ್1 ವೈರಸ್ ಪತ್ತೆಯಾಗಿರುವುದಾಗಿ ಹೇಳಿದ್ದಾರೆ.
ಆದರೆ ಪ್ರಧಾನಿ ಸೆನ್ಗೆ ವಾರಗಳ ಕಾಲ ನೀಡಿದ ಚಿಕಿತ್ಸೆಯ ನಂತರ ಅವರ ಆರೋಗ್ಯ ಸುಧಾರಣೆಯಲ್ಲಿದೆ ಎಂದು ಅವರು ಈ ಸಂದರ್ಭದಲ್ಲಿ ತಿಳಿಸಿದ್ದಾರೆ.
ಅಲ್ಲದೇ ಉಪ ಪ್ರಧಾನಿ ಯಿಮ್ ಚ್ಚಾಯ್ ಲೈ, ಹಿರಿಯ ಸಚಿವ ಚ್ಚಾಯ್ ಥಾನ್ ಮತ್ತು ತಾವೋ ಸೆಂಗ್ಹವರ್ ಅವರಲ್ಲಿಯೂ ಎಚ್1ಎನ್1 ಸೋಂಕು ಪತ್ತೆಯಾಗಿರುವುದಾಗಿ ವಿವರಿಸಿದ್ದಾರೆ. ಆ ನಿಟ್ಟಿನಲ್ಲಿ ಈ ಸೋಂಕು ತಡೆಗಾಗಿ ಆರೋಗ್ಯ ಸಚಿವಾಲಯ ಕಟ್ಟು ನಿಟ್ಟಿನ ಕ್ರಮ ಕೈಗೊಂಡಿರುವುದಾಗಿಯೂ ಆರೋಗ್ಯ ಸಚಿವಾಲಯದ ಲೈ ಸೋವಾನ್ನಾ ಹೇಳಿದ್ದಾರೆ. ಕಾಂಬೋಡಿಯಾದಲ್ಲಿ ಈಗಾಗಲೇ 591ಎಚ್1ಎನ್1 ಸೋಂಕಿನಿಂದ ಬಳಲುತ್ತಿದ್ದು, ಆರು ಮಂದಿ ಸಾವನ್ನಪ್ಪಿದ್ದಾರೆ.