ಕರ್ನಾಟಕ ಸೇರಿದಂತೆ ಹನ್ನೆರಡು ರಾಜ್ಯಗಳಲ್ಲಿ ನಡೆದ ಎರಡನೆ ಹಂತದ ಲೋಕಸಭಾ ಚುನಾವಣೆಯಲ್ಲಿ ಅಂದಾಜು ಸುಮಾರು ಶೇ.55ರಷ್ಟು ಮತದಾನವಾಗಿದೆ. ಕರ್ನಾಟಕದಲ್ಲಿ ಶೇ. 51ರಷ್ಟು ಮತದಾನವಾಗಿದೆ ಎಂಬುದಾಗಿ ಪ್ರಾಥಮಿಕ ವರದಿಗಳು ಹೇಳಿವೆ. ನಿಖರ ವರದಿಗಳು ಇನ್ನಷ್ಟೆ ಲಭ್ಯವಾಗಬೇಕಾಗಿದೆ. ನಕ್ಸಲ್ ಪೀಡಿತ ಜಾರ್ಖಂಡ್ ಹೊರತು ಪಡಿಸಿದರೆ ಬಹುತೇಕ ಶಾಂತಿಯುತ ಮತದಾನ ನಡೆದಿದೆ. ಆಂಧ್ರಪ್ರದೇಶ ಹಾಗೂ ಅಸ್ಸಾಮ್‌ನಲ್ಲಿ ಸಣ್ಣಪುಟ್ಟ ಗಲಭೆಗಳು ನಡೆದಿವೆ.
ತ್ರಿಪುರಾದಲ್ಲಿ ಶೇ.78ರಷ್ಟು ಗರಿಷ್ಠ ಮತದಾನವಾಗಿದ್ದರೆ, ಬಿಹಾರ ಹಾಗೂ ಉತ್ತರ ಪ್ರದೇಶದಲ್ಲಿ ಕನಿಷ್ಠ ಶೇ.44ರಷ್ಟು ಮತದಾನವಾಗಿದೆ. ಎರಡನೆಯ ಹಂತದಲ್ಲಿ 121 ಮಹಿಳೆಯರು ಸೇರಿದಂತೆ 2,041 ಅಭ್ಯರ್ಥಿಗಳು ತಮ್ಮ ಅದೃಷ್ಟವನ್ನು ಪರೀಕ್ಷೆಗೊಡ್ಡಿಕೊಂಡಿದ್ದಾರೆ.
ಜಾರ್ಖಂಡ್‌ನಲ್ಲಿ ಶೇ.50, ಆಂಧ್ರ ಶೇ.58, ಬಿಹಾರ ಶೇ.44, ಅಸ್ಸಾಂ ಶೇ.60 ತ್ರಿಪುರಾದಲ್ಲಿ ಶೇ.78 ಹಾಗೂ ಕರ್ನಾಟಕದಲ್ಲಿ ಶೇ. 51ರಷ್ಟು ಮತದಾರರು ಮತಗಟ್ಟೆಯತ್ತ ಮುಖಮಾಡಿದ್ದಾರೆ.
ಆಂಧ್ರಪ್ರದೇಶದ 20, ಅಸ್ಸಾಮಿನ 11, ಬಿಹಾರದ 12, ಗೋವಾದ ಎರಡು, ಜಮ್ಮು ಕಾಶ್ಮೀರದ ಒಂದು, ಕರ್ನಾಟಕದ 17, ಮಧ್ಯಪ್ರದೇಶದ 13, ಮಹಾರಾಷ್ಟ್ರದ 25, ಒರಿಸ್ಸಾದ 11, ತ್ರಿಪುರಾದ ಎರಡು, ಉತ್ತರಪ್ರದೇಶದ 17 ಮತ್ತು ಜಾರ್ಖಂಡ್‌ನ ಎಂಟು ಕ್ಷೇತ್ರಗಳಲ್ಲಿ ಮತದಾನ ನಡೆಯಿತು. ಇದರೊಂದಿಗೆ ಆಂಧ್ರಪ್ರದೇಶದಲ್ಲಿ(140) ಹಾಗೂ ಒರಿಸ್ಸಾದಲ್ಲಿ (77) ವಿಧಾನಸಭಾ ಸ್ಥಾನಗಳಿಗೆ ದ್ವಿತೀಯ ಹಾಗೂ ಕೊನೆಯ ಹಂತದ ಮತದಾನ ನಡೆಯಿತು.
| 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ