ಆಸ್ಟ್ರೇಲಿಯದಲ್ಲಿ ಹಿಂಸಾತ್ಮಕ ಜನಾಂಗೀಯ ದಾಳಿಗಳ ಪಟ್ಟಿಗೆ ಒಂದಾದ ಮೇಲೊಂದು ಸೇರ್ಪಡೆಯಾಗುತ್ತಿದ್ದು, ಅದಕ್ಕೆ ಕೊನೆಯೇ ಇಲ್ಲವೆಂಬಂತಾಗಿದೆ. ಮೆಲ್ಬೋರ್ನ್ ಪೂರ್ವ ಉಪನಗರದಲ್ಲಿ ಇನ್ನೊಬ್ಬ ಭಾರತೀಯ ವಿದ್ಯಾರ್ಥಿ ಜನಾಂಗೀಯ ದ್ವೇಷದ ದಳ್ಳುರಿಗೆ ಗುರಿಯಾಗಿದ್ದಾನೆ.
ಶುಕ್ರವಾರ ರಾತ್ರಿ ಬೊರೊನಿಯದಲ್ಲಿ ಕಾರಿನಲ್ಲಿ ಕುಳಿತುಕೊಳ್ಳಲು ತೆರಳುತ್ತಿದ್ದ 20 ವರ್ಷ ವಯಸ್ಸಿನ ಸನ್ನಿ ಬಜಾಜ್ ಎಂಬ ಭಾರತೀಯನನ್ನು ಜನಾಂಗೀಯ ನಿಂದನೆ ಮಾಡಿದ್ದಲ್ಲದೇ ಇಬ್ಬರು ವ್ಯಕ್ತಿಗಳು ಮುಷ್ಠಿಯಿಂದ ಗುದ್ದಿದರೆಂದು ವರದಿಯಾಗಿದೆ. ಅವರು ನನ್ನ ಬಳಿ ಬಂದು ಹಣಕ್ಕಾಗಿ ಒತ್ತಾಯಿಸಿದರು. ಹಣವಿಲ್ಲವೆಂದು ಹೇಳಿದಾಗ ಹಲ್ಲೆ ಮಾಡಿದರೆಂದು ಡೀಕಿನ್ ವಿವಿಯ ವಿದ್ಯಾರ್ಥಿ ಬಜಾಜ್ ತಿಳಿಸಿದ್ದಾಗಿ 'ದಿ ಏಜ್' ವರದಿ ಮಾಡಿದೆ.
ಅವರು ತಮ್ಮ ಕಾರಿನ ಬಾಗಿಲನ್ನು ಬಡಿದು ತಲೆ ಮತ್ತು ಹೊಟ್ಟೆಯ ಮೇಲೆ ಮುಷ್ಠಿಪ್ರಹಾರ ಮಾಡಿದರು ಮತ್ತು ಜನಾಂಗೀಯ ನಿಂದನೆ ಮಾಡಿದರೆಂದು ದೆಹಲಿ ಮ‌ೂಲದ ವಿದ್ಯಾರ್ಥಿ ದೂರಿದ್ದಾನೆ. ತಮ್ಮ ಕೈಯ ಬೆರಳು ಮುರಿದಿದ್ದು ಮ‌ೂಗಿನಲ್ಲಿ ರಕ್ತ ಸೋರಿತೆಂದು ಅವರು ಹೇಳಿದ್ದಾರೆ.
ದಾಳಿಕೋರರು 20ರ ಪ್ರಾಯದಲ್ಲಿದ್ದು ಒಬ್ಬ ಬಿಳಿಯ ಮತ್ತು ಇನ್ನೊಬ್ಬ ಆಫ್ರಿಕ ಮ‌ೂಲದವನೆಂದು ಬಜಾಜ್ ತಿಳಿಸಿದ್ದಾರೆ. ಒಂದು ತಿಂಗಳಿಗಿಂತ ಕಡಿಮೆ ಅವಧಿಯಲ್ಲಿ ಆಸ್ಟ್ರೇಲಿಯದಲ್ಲಿ ಭಾರತೀಯರ ಮೇಲೆ 14ನೇ ದಾಳಿ ಇದಾಗಿದ್ದು, ಆಸ್ಟ್ರೇಲಿಯ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ