ಇನ್ನು ಟಾಪ್ಅಪ್ ಮೇಲೆ ಫುಲ್ ಟಾಕ್‌ಟೈಂ ನವದೆಹಲಿ, ಮಂಗಳವಾರ, 2 ಸೆಪ್ಟೆಂಬರ್ 2008( 10:18 IST )

ಟಾಪ್ಅಪ್ ಕಾರ್ಡ್‌ಗಳ ಮೇಲೆ ವಿಧಿಸುವ ಪ್ರೊಸೆಸಿಂಗ್ ವೆಚ್ಚವನ್ನು ಮನ್ನಾ ಮಾಡುವಂತೆ ಟೆಲಿಕಾಂ ನಿಯಂತ್ರಣ ಸಂಸ್ಥೆ ಟ್ರಾಯ್ ಟೆಲಿಕಾಂ ನಿರ್ವಾಹಕರಿಗೆ ಸೂಚನೆ ನೀಡಿದ್ದು, ಇದರಿಂದಾಗಿ, ಸೆಪ್ಟೆಂಬರ್ 15ರ ನಂತರ ಟಾಪ್ಅಪ್ ವೇಳೆ ಪ್ರೀಪೈಡ್ ಗ್ರಾಹಕರು ಪೂರ್ತಿ ಟಾಕ್‌ಟೈಂ ಪಡೆಯಲಿದ್ದಾರೆ. ಪ್ರೀಪೈಡ್ ಗ್ರಾಹಕರು ಕೇವಲ ಆಡಳಿತ ವೆಚ್ಚವನ್ನಷ್ಟೇ ನೀಡಬೇಕಾಗಿದ್ದು, ಇದು ಎರಡು ರೂಪಾಯಿಗಿಂತ ಹೆಚ್ಚಾಗಿರುವುದಿಲ್ಲ ಎಂದು ಟ್ರಾಯ್ ಹೇಳಿದೆ. ಪ್ರತ್ಯೇಕ ಟಾಕ್‌ಟೈಮ್ ಕೊಡಬೇಕಾಗಿರುವ ಈಗಾಗಲೇ ವ್ಯಾಲಿಡಿಟಿಯನ್ನು ಹೊಂದಿರುವ ಗ್ರಾಹಕರಿಗೂ ಟಾಪ್ಅಪ್ ವೇಳೆ ಟೆಲಿಕಾಂ ಸಂಸ್ಥೆಗಳು ನಿರ್ದಿಷ್ಟ ಮೊತ್ತವನ್ನು ಕಡಿತಗೊಳಿಸುತ್ತಿರುವುದು ಟ್ರಾಯ್ ಗಮನಕ್ಕೆ ಬಂದಿತ್ತು. ಸ್ಥಿರ ಶುಲ್ಕವನ್ನು ಪಾವತಿ ಮಾಡುವ ಮೂಲಕ ಗ್ರಾಹಕರಿಗೆ ಈಗಾಗಲೇ ವ್ಯಾಲಿಡಿಟಿ ನೀಡಲಾಗಿದ್ದು, ಪ್ರತ್ಯೇಕ ಟಾಪ್ಅಪ್ ಮೂಲಕ ರೀಚಾರ್ಜ್ ಮಾಡುವ ಗ್ರಾಹಕರ ಮೇಲೆ ಪ್ರೊಸೆಸಿಂಗ್ ವೆಚ್ಚ ಹೇರುವುದು ನ್ಯಾಯಸಮ್ಮತವಲ್ಲ ಎಂದು ಟ್ರಾಯ್ ತಿಳಿಸಿದೆ. ಟೆಲಿಕಾಂ ಸೇವೆಯನ್ನು ಗ್ರಾಹಕ ಸ್ನೇಹಿ ಮತ್ತು ಪಾರದರ್ಶಕವಾಗಿಡಲು, ತನ್ನ ಇತ್ತೀಚಿನ ನೀತಿಯಲ್ಲಿ ಇದು ಟ್ರಾಯ್ ತೆಗೆದುಕೊಂಡ ಮೊದಲ ಕ್ರಮವಾಗಿದೆ. ಇದರೊಂದಿಗೆ, ಸ್ಥಳೀಯ ಭಾಷೆಗಳು ಪ್ರಧಾನವಾಗಿರುವ ಉಪನಗರಗ ಮತ್ತು ಗ್ರಾಮಾಂತರ ಪ್ರದೇಶಗಳತ್ತ ಟೆಲಿಕಾಂ ಸಂಸ್ಥೆಗಳು ದೃಷ್ಟಿ ಹಾಯಿಸಿರುವುದರಿಂದ ಟಾರಿಫ್ ಸಂಬಂಧಿ ಮಾಹಿತಿಗಳು ಪ್ರಾದೇಶಿಕ ಭಾಷೆಯಲ್ಲಿ ದೊರಕುವಂತೆ ಮಾಡಲು ಟೆಲಿಕಾಂ ಸಂಸ್ಥೆಗಳಿಗೆ ಟ್ರಾಯ್ ಕರೆ ನೀಡಿದೆ.