ಅವಿನಾಶ್ ಬಿ. ಪೊಲೀಸರಿಗೆ ಮನಬಂದಂತೆ ಕಲ್ಲೆಸೆಯಲಾಯಿತು; ಪೊಲೀಸ್ ಠಾಣೆಗೆ ಬೆಂಕಿ ಹಚ್ಚಲಾಯಿತು; ಕಾರು-ಬೈಕುಗಳನ್ನು ಸುಟ್ಟು, ಬಡಿದು ಪುಡಿ ಮಾಡಲಾಯಿತು; ಪೊಲೀಸರು ರಕ್ತ ಸುರಿಸುತ್ತಾ ಓಡಿದರು; ಪತ್ರಕರ್ತರ ಮೇಲೂ ಕಲ್ಲೆಸೆದು ಹಲ್ಲೆ ನಡೆಸಲಾಯಿತು... ಒಟ್ಟಿನಲ್ಲಿ ನ್ಯಾಯಾಂಗ, ಕಾರ್ಯಾಂಗ, ಮಾಧ್ಯಮರಂಗಗಳು ನಲುಗಿದವು.ಇದು ಶುದ್ಧ ಪುಂಡಾಟಿಕೆಯಾದರೂ ಗೂಂಡಾಗಳ ನಡುವಣ ಸಂಘರ್ಷದ ಚಿತ್ರಣವಲ್ಲ; ಹಾಗಂತ ತಾಲಿಬಾನೀಕರಣಗೊಳ್ಳುತ್ತಿರುವ ಪಾಕಿಸ್ತಾನದ ದೃಶ್ಯವೂ ಅಲ್ಲ. ನೀವು ನಂಬಲೇ ಬೇಕು. ನಮಗೆಲ್ಲಾ ನ್ಯಾಯ ಒದಗಿಸಲು ವಕಾಲತ್ತು ನಡೆಸುತ್ತಾ 'ಹೆಣಗಾಡುವ' ಕಾನೂನು ಪ್ರತಿಪಾದಕರಾದ ತಮಿಳುನಾಡು ವಕೀಲರು-ಪೊಲೀಸರು ಮಾಡಿದ್ದು! ಅದು ಕೂಡ ಯಾವುದೋ ನ್ಯಾಯಾಲಯವಲ್ಲ, ದೇಶದ ಘನತೆವೆತ್ತ ಹೈಕೋರ್ಟುಗಳಲ್ಲೊಂದಾದ ಮದ್ರಾಸ್ ಉಚ್ಚ ನ್ಯಾಯಾಲಯದಲ್ಲಿ!ಟಿವಿ ಚಾನೆಲ್‌ಗಳಲ್ಲಿ ಗುರುವಾರ ಅಪರಾಹ್ನ ಈ ಬೀದಿಜಗಳದಂತೆ ಪೊಲೀಸರು-ವಕೀಲರು ಕಚ್ಚಾಡುವ ದೃಶ್ಯಾವಳಿಗಳನ್ನು ನೋಡುತ್ತಿದ್ದರೆ, ಥೇಟ್ ಗೂಂಡಾ ಸಂಸ್ಕೃತಿಯ ಭವ್ಯ ದರುಶನ! ನ್ಯಾಯ ಒದಗಿಸುವಲ್ಲಿ ಪ್ರಧಾನ ಪಾತ್ರ ವಹಿಸಬೇಕಿದ್ದವರ ಕೈಯಲ್ಲಿ ಕಲ್ಲು, ದೊಣ್ಣೆ! ವಾಹನ ಪುಡಿಗಟ್ಟುವುದು, ಪೊಲೀಸ್ ಠಾಣೆಗೆ ಬೆಂಕಿ ಹಚ್ಚುವುದು.... ಅಬ್ಬಬ್ಬಾ... ನ್ಯಾಯ ದೇವತೆಯು ಇದನ್ನೆಲ್ಲಾ ನೋಡದಂತೆ ಕಣ್ಣಿಗೆ ಕಪ್ಪು ಪಟ್ಟಿ ಹಾಕಿಟ್ಟದ್ದು ಇಲ್ಲಿ ಸಾರ್ಥಕವಾಯಿತು! ಮದ್ರಾಸ್ ಹೈಕೋರ್ಟ್‌ನಲ್ಲಿ ಗುರುವಾರ ನಡೆದದ್ದು ಇಡೀ ದೇಶವೇ ತಲೆ ತಗ್ಗಿಸಬೇಕಾದ ಘಟನೆ. ಭಾರತದ ನ್ಯಾಯಾಂಗ ಇತಿಹಾಸದಲ್ಲಿ ಇಂಥದ್ದು ಇದುವರೆಗೆ ನಡೆದಿರಲಾರದು. ದೇಶದ ಆಧಾರ ಸ್ಥಂಭಗಳಲ್ಲೊಂದಾದ ನ್ಯಾಯಾಂಗ ವ್ಯವಸ್ಥೆಯ ನ್ಯಾಯ ಪ್ರತಿಪಾದಕರು, ಕಾನೂನು ಪಾಲಕರು ಕಾನೂನನ್ನೇ ಕೈಗೆತ್ತಿಕೊಂಡು ಮನಬಂದಂತೆ, ಕಲ್ಲು ತೂರಿದರು. ವ್ಯವಸ್ಥೆಯ ಮತ್ತೊಂದು ಆಧಾರ ಸ್ತಂಭ ಮಾಧ್ಯಮಗಳವರನ್ನೂ ಬಿಡಲಿಲ್ಲ. ಪತ್ರಕರ್ತರನೇಕರು ಕಲ್ಲೇಟು ತಿಂದು ರಕ್ತ ಸುರಿಸುತ್ತಾ ಓಡುತ್ತಿದ್ದರು. ನ್ಯಾಯಾಧೀಶರೂ ಗಾಯಗೊಂಡರು.ಇತ್ತೀಚೆಗಷ್ಟೇ ಇದೇ ಚೆನ್ನೈಯಲ್ಲಿ ಕಾನೂನು ಬೋಧಿಸುವ ಕಾನೂನು ಕಾಲೇಜಿನಲ್ಲಿ ವಿದ್ಯಾರ್ಥಿಗಳು ಮಚ್ಚು-ದೊಣ್ಣೆ ಹಿಡಿದು ಪೌರುಷ ಪ್ರದರ್ಶಿಸಿದ್ದನ್ನು ಕಂಡಿದ್ದೇವೆ, ಕೇಳಿದ್ದೇವೆ. ಹೀಗಾಗಿ ಇಂತಹ 'ಮೂಲಭೂತ' ಶಿಕ್ಷಣ ಪಡೆದು ಬಂದ ನ್ಯಾಯ ಪ್ರತಿಪಾದಕರಿಂದ ಮತ್ತೇನನ್ನು ನಿರೀಕ್ಷಿಸಲು ಸಾಧ್ಯ ಎಂಬ ಪ್ರಶ್ನೆ ಬಡ ಜನತೆಯದು.| ನ್ಯಾಯದೇವತೆಯೇ, ಇವರನ್ನು ಕ್ಷಮಿಸು |
| | ಥೇಟ್ ಗೂಂಡಾ ಸಂಸ್ಕೃತಿಯ ಭವ್ಯ ದರುಶನ! ನ್ಯಾಯ ಒದಗಿಸುವಲ್ಲಿ ಪ್ರಧಾನ ಪಾತ್ರ ವಹಿಸಬೇಕಿದ್ದವರ ಕೈಯಲ್ಲಿ ಕಲ್ಲು, ದೊಣ್ಣೆ! ವಾಹನ ಪುಡಿಗಟ್ಟುವುದು, ಪೊಲೀಸ್ ಠಾಣೆಗೆ ಬೆಂಕಿ ಹಚ್ಚುವುದು.. ಅಬ್ಬಬ್ಬಾ... ನ್ಯಾಯ ದೇವತೆಯು ಇದನ್ನೆಲ್ಲಾ ನೋಡದಂತೆ ಕಣ್ಣಿಗೆ ಕಪ್ಪು ಪಟ್ಟಿ ಹಾಕಿಟ್ಟದ್ದು ಇಲ್ಲಿ ಸಾರ್ಥಕವಾಯಿತು! |
| |
|
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
