ಷರೀಫ್, ಬೇನಜೀರ್ ಭುಟ್ಟೊ ನಾಮಪತ್ರ ಸಲ್ಲಿಕೆ ಇಸ್ಲಾಮಾಬಾದ್, ಸೋಮವಾರ, 26 ನವೆಂಬರ್ 2007( 19:55 IST )

PTI ಪಾಕಿಸ್ತಾನದ ಮಾಜಿ ಪ್ರಧಾನಮಂತ್ರಿ ನವಾಜ್ ಷರೀಫ್ ಅವರು ರಾಷ್ಟ್ರದ ಸಾರ್ವತ್ರಿಕ ಚುನಾವಣೆಯಲ್ಲಿ ಸ್ಪರ್ಧಿಸಲು ನಾಮಪತ್ರ ಸಲ್ಲಿಸಿದ್ದಾರೆ. ಆದರೆ ಅಧ್ಯಕ್ಷ ಮುಷರ್ರಫ್ ರಾಷ್ಟ್ರದಲ್ಲಿ ತುರ್ತುಪರಿಸ್ಥಿತಿಯನ್ನು ರದ್ದುಮಾಡದಿದ್ದರೆ ತಾವು ಚುನಾವಣೆಗೆ ನಿಲ್ಲದೇ ಅದನ್ನು ಬಹಿಷ್ಕರಿಸುವುದಾಗಿ ಹೇಳುವ ಮೂಲಕ ತುರ್ತುಪರಿಸ್ಥಿತಿ ವಿರುದ್ಧ ತಮ್ಮ ಅಸಮಾಧಾನವನ್ನು ಪ್ರಕಟಿಸಿದ್ದಾರೆ. ಇತ್ತೀಚೆಗೆ ತಾನೆ ಪಾಕಿಸ್ತಾನಕ್ಕೆ ಹಿಂತಿರುಗಿದ ಇನ್ನೊಬ್ಬರು ಮಾಜಿ ಪ್ರಧಾನಮಂತ್ರಿಯಾದ ಬೇನಜೀರ್ ಭುಟ್ಟೊ ಕೂಡ ಮಹಿಳೆಯರಿಗೆ ಮೀಸಲಾದ ಸ್ಥಾನಗಳಲ್ಲಿ ಒಂದಕ್ಕೆ ನಾಮಪತ್ರ ಸಲ್ಲಿಸಿದ್ದಾರೆ. PTI ಏತನ್ಮಧ್ಯೆ, ಮುಷರ್ರಫ್ ಜನರಲ್ ಹುದ್ದೆಯನ್ನು ತ್ಯಜಿಸಿ ಈ ವಾರ ಅಧ್ಯಕ್ಷರಾಗಿ ಇನ್ನೊಂದು ಅವಧಿಗೆ ಪ್ರಮಾಣವಚನ ಸ್ವೀಕರಿಸುವ ನಿರೀಕ್ಷೆಯಿದೆ. 1999ರಲ್ಲಿ ಮುಷರ್ರಫ್ ಅವರಿಂದ ಪದಚ್ಯುತರಾದ ಷರೀಫ್, ಭಾನುವಾರ 7 ವರ್ಷಗಳ ಬಹಿಷ್ಕಾರದ ಬಳಿಕ ಪಾಕಿಸ್ತಾನಕ್ಕೆ ಹಿಂತಿರುಗಿದ್ದಾರೆ. ನವಾಜ್ ಷರೀಫ್ ಅವರನ್ನು ಲಾಹೋರ್ ವಿಮಾನನಿಲ್ದಾಣದಲ್ಲಿ ಅವರ ಬೆಂಬಲಿಗರು ಹರ್ಷೋದ್ಗಾರದಿಂದ ಸ್ವಾಗತಿಸಿದರು. ಅವರು ಎರಡು ಸ್ಥಾನಗಳಿಗೆ ಸ್ಪರ್ಧಿಸುವ ಸಲುವಾಗಿ ಕೊನೆಯ ದಿನವಾದ ಸೋಮವಾರ ನಾಮಪತ್ರ ಸಲ್ಲಿಸಿದರು.ಬೇನಜೀರ್ ಭುಟ್ಟೊ ಅವರು ಲರ್ಕಾನಾ ಕ್ಷೇತ್ರದಲ್ಲಿ ಎರಡು ಕಾಯಂ ಸ್ಥಾನಗಳಿಗೆ ನಾಮಪತ್ರ ಸಲ್ಲಿಸಿದರು. ಚುನಾವಣೆ ಬಹಿಷ್ಕಾರದ ಸಾಧ್ಯತೆಯನ್ನು ಅವರು ಕೂಡ ಮುಕ್ತವಾಗಿರಿಸಿದ್ದಾರೆ. ನವಾಜ್ ಷರೀಫ್ ಅವರು ಬೇನಜೀರ್ ಭುಟ್ಟೊ ಚುನಾವಣೆ ಭವಿಷ್ಯವನ್ನು ಮಸಕು ಮಾಡಬಹುದೆಂದು ಮುಷರ್ರಫ್ ಆಶಿಸಿದ್ದಾರೆಂದು ನಂಬಲಾಗಿದೆ. ಮುಂದಿನ ಕೆಲವು ದಿನಗಳಲ್ಲಿ ಮುಷರ್ರಫ್ ಸೇನಾ ಮುಖ್ಯಸ್ಥರ ಹುದ್ದೆಯನ್ನು ಅಧಿಕೃತವಾಗಿ ತ್ಯಜಿಸುತ್ತಾರೆಂದು ರಕ್ಷಣಾ ಸಚಿವಾಲಯವು ಶೀಘ್ರದಲ್ಲೇ ಪ್ರಕಟಿಸುವ ಲಕ್ಷಣಗಳು ಗೋಚರಿಸಿವೆಂದು ವರದಿಯಾಗಿದೆ. ಎರಡನೆ ಬಾರಿಗೆ ಅಧ್ಯಕ್ಷರಾಗಿ ಪ್ರಮಾಣ ಸ್ವೀಕರಿಸುವ ಮುಂಚೆ ಅವರು ಜನರಲ್ ಹುದ್ದೆಯನ್ನು ತ್ಯಜಿಸಬೇಕೆಂದು ಅವರ ಮೇಲೆ ತೀವ್ರವಾದ ಅಂತಾರಾಷ್ಟ್ರೀಯ ಒತ್ತಡ ಹೇರಲಾಗಿತ್ತು.