ಹಳೇ ಒಳಜಗಳಕ್ಕೆ ಮತ್ತೆ ಮರಳಿತು ಬಿಜೆಪಿ... ಬೆಂಗಳೂರು, ಬುಧವಾರ, 28 ನವೆಂಬರ್ 2007( 11:06 IST )

ಮನೆಯ ಹೊರಗಡೆ ಮಹತ್ವಾಕಾಂಕ್ಷೀ ಜನಜಾಗೃತಿ ಯಾತ್ರೆ ನಡೆಯುತ್ತಿದ್ದರೆ, ಮನೆಯ ಒಳಗಡೆ ಭಿನ್ನಮತದ ಹೊಗೆ ಹುಟ್ಟಿಕೊಂಡಿರುವುದು ಬಿಜೆಪಿ ವರಿಷ್ಠರ ನಿದ್ರೆಗೆಡಿಸಿದೆ. ಸರಕಾರ ರಚನೆಯಾಗುತ್ತದೆ ಎಂದಾದಾಗ ಎಲ್ಲವೂ ಸರಿ ಇದೆ ಎಂಬಂತೆ ಒಗ್ಗಟ್ಟು ಪ್ರದರ್ಶಿಸಿದ್ದ ಬಿಜೆಪಿಯಲ್ಲಿ, ಇದೀಗ ಸರಕಾರ ರಚಿಸಲಾರದೆ ಕೈಸುಟ್ಟುಕೊಂಡ ಬಳಿಕ ಮತ್ತದೇ ಆಂತರಿಕ ಭಿನ್ನಮತ ಕಾಣಿಸಿಕೊಳ್ಳತೊಡಗಿದೆ. ತಮ್ಮ ನೇತೃತ್ವದ ಸರ್ಕಾರಕ್ಕೆ ಬೆಂಬಲ ಸಿಗದೆ ಆದ ಅನ್ಯಾಯವನ್ನು ಜನರ ಮುಂದೆ ತೋಡಿಕೊಳ್ಳಲು ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪ ಒಂದೆಡೆ ಜನಜಾಗೃತಿ ಯಾತ್ರೆಯನ್ನು ಹಮ್ಮಿಕೊಂಡಿದ್ದಾರೆ. ಇದಕ್ಕೆ ಜನರಿಂದ ನಿರೀಕ್ಷೆಗೂ ಮೀರಿ ಪ್ರೋತ್ಸಾಹವೂ ಸಿಗುತ್ತಿದೆ. ಅದರೆ ಮತ್ತೊಂದೆಡೆ ಪಕ್ಷದ ಇತರ ನಾಯಕರಾದ ಕೆ.ಎಸ್.ಈಶ್ವರಪ್ಪ, ಜಗದೀಶ್ ಶೆಟ್ಟರ್ ಹಾಗೂ ಡಿ.ಎಚ್.ಶಂಕರಮೂರ್ತಿ ಅವರು ಯಡಿಯೂರಪ್ಪ ವಿರುದ್ಧ ವರಿಷ್ಠರ ಮುಂದೆ ಸದ್ದಿಲ್ಲದಂತೆ ಕೆಂಪುಬಾವುಟ ಹಾರಿಸುತ್ತಿದ್ದಾರೆ. ಜನಜಾಗೃತಿ ಯಾತ್ರೆ ಹಮ್ಮಿಕೊಳ್ಳುವಾಗ ತಮ್ಮನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ಯಡಿಯೂರಪ್ಪ ಏಕಪಕ್ಷೀಯ ನಿರ್ಧಾರ ಕೈಗೊಂಡಿದ್ದಾರೆ. ಈ ಕುರಿತು ಮೌಖಿಕವಾಗಿ ತಮ್ಮೊಂದಿಗೆ ಚರ್ಚಿಸದೆ ಫ್ಯಾಕ್ಸ್ ಮೂಲಕ ಮಾಹಿತಿ ರವಾನಿಸಿದ್ದಾರೆ ಎಂಬುದು ಈ ನಾಯಕತ್ರಯರ ಅಸಮಾಧಾನದ ಮೂಲ ಕಾರಣ. ಇದರ ಜತೆಯಲ್ಲೇ ಜೆಡಿಎಸ್‌ನ ಚೆಲುವರಾಯಸ್ವಾಮಿಯವರನ್ನು ಬಿಜೆಪಿಗೆ ಸೆಳೆದುಕೊಳ್ಳುವ ಯತ್ನಗಳು ನಡೆಯುತ್ತಿವೆ. ಮಾಜಿ ಸಚಿವ ಅಶೋಕ್ ನೇತೃತ್ವದಲ್ಲಿ ಈ ಕುರಿತಾದ ಮಾತುಕತೆ ಸಾಗುತ್ತಿದೆ ಎಂಬ ಸುದ್ದಿಗಳು ಹಬ್ಬಿವೆ. ಸದ್ಯದಲ್ಲಿಯೇ ಚುನಾವಣೆಗಳು ಬರುತ್ತಿರುವ ಹಿನ್ನೆಲೆಯಲ್ಲಿ ಹಳೇ ಮೈಸೂರು ಪ್ರಾಂತ್ಯದಲ್ಲಿ ಬಿಜೆಪಿಯ ಬಲವರ್ಧನೆ ಮಾಡುವುದರ ಪ್ರಯತ್ನ ಇದಾಗಿದೆ ಎಂದು ತಿಳಿದುಬಂದಿದೆ. ಒಂದೆಡೆ ಆಂತರಿಕ ಭಿನ್ನಮತದ ಹೊಗೆ, ಮತ್ತೊಂದೆಡೆ ಪಕ್ಷದ ಬಲಸಂವರ್ಧನೆಯ ಮಹತ್ವಾಕಾಂಕ್ಷೀ ಪ್ರಯತ್ನ. ಬಿಜೆಪಿ ವರಿಷ್ಠರು ಈ ಎರಡೂ ಬಗೆಯ ನಡೆಗಳಿಗೆ ಹೇಗೆ ಪ್ರತಿಕ್ರಿಯಿಸಲಿದ್ದಾರೆ ಎಂಬುದೇ ಮುಂದಿರುವ ಕುತೂಹಲ.